TRAMONTI SICILIANI

w l'Italia

          
       W L'ITALIA

Tempi nivuri pi tutti

E nun c’è cchiù sicurizza,

Cu cumanna si nni futti

E nni lassa ca munnizza. 

L’erba crisci nta li strati

Nun la leva cu è pagatu,

Tutti su raccumannati

fissa iu ca l’haiu vutatu! 

Lu me mali sugnu iu

Cca nni sarba sulu Diu.

Si vulissimu canciari

Pi cu cazzu am’a vutari? 

Si tu voti scheda bianca

nun ti senti rilassatu

lu curaggiu a tia ti manca

e poi mali si taliatu, 

si a sinistra metti a cruci

e nun voti  u cavaleri

la cuscenza ietta vuci

nta munnizza semu arrieri, 

si vutassimu Casini

nui vincissimu lu ternu,

iddi no nun su cretini,

vannu sempri a lu guvernu! 

Si vutamu cincu stiddi,

Ca è lu votu di prutesta,

chi cci cunti e picciriddi

ca pirduta hai tu la testa? 

Chista è la democrazia

Dammi u votu e penza a mia.

Tu lu sai ca la munnizza

È signali di ricchizza? 

Si nni trovi in abbondanza

È benessiri c’avanza.

Nta munnizza va a circari

Cu nun avi chi manciari! 

S ‘a munnizza va livata,

chi cci metti nta pignata?

Trunzi i vrocculi munnati

E quattr’ossa gia spurpati 

Meggiu i nenti, fazzu o broru

i me figghi cu me suoru

accussì ponnu manciari

e tiramu nui a campari! 

Quannu è ca vai a vutari

Metti a cruci e nun pinzari

Tantu u fattu è risaputu

Ca tu sulu si u futtutu!! 

Pa 09/03/13 

Giovanni

                LU VENTU AMICU

         A MUNNIZZA A PARTINICU         

La furtuna di la genti ca si trova a Partinicu,

e lu sapi lu modernu comu lu sapia l’anticu,

è lu ventu quannu tira ca ti senti tu ammuttari

la munnizza di li strati tutta si la va a scupari!

L’assissurì  ch’è atturniatu di li tanti so spazzini

ntra la chiesa si nni vannu quasi tutti li matini

a priari lu Signuri  puru dintra a lu cummentu

ca pi puliziari i strati cci mannassi un forti ventu!

E prumisiru a li santi  cu passioni e tutti in coru

ca si cci fannu la grazia  una scupa avrannu d’oru!

la Maronna di lu ponti si truvò di dda a passari

pi la cosa indispittita dissi a tutti: a travagghiari!

A lu diri di la santa chi cci fu ntra lu cummentu?

chianti, vuci, e pirfinu c’è cu appi un mancamentu!

Iu rispettu assai la santa, ma purtroppu nun sapia

ca a parola “travagghiari” purtò a tutti l’allergia!

E perciò lu jornu appressu foru tutti in malatia

l’assessuri nun si vitti unni fussi cu u sapia?

prucissioni pi li strati e la cruci cu lu Cristu

e lu Sinnacu si nni ju alla Rai a chi l’ha vistu?

Pi fortuna, e lu ripetu, cca la genti avi n’amicu

è lu ventu quannu tira pi li strati a Partinicu.

si nun fussi pi sta cosa  pa munnizza nta li strati

tutti li partinicoti cca murissinu anniati!

Pa, lì 17/05/12

Giovanni

il risveglio della natura